संपादक/ सागर मूलकला
सिरोंचा : सिरोंचा नगरपंचायतीच्या राजकारणात आज निर्णायक घडामोडी घडण्याची शक्यता असून, अध्यक्ष व उपाध्यक्षांविरोधात दाखल करण्यात आलेल्या अविश्वास प्रस्तावावर आज मतदान होणार आहे. त्यामुळे नगरपंचायतीतील सत्तासमीकरण बदलण्याची चिन्हे स्पष्टपणे दिसू लागली आहेत.मिळालेल्या माहितीनुसार, एकूण १४ नगरसेकांनी एकत्र येत अध्यक्ष व उपाध्यक्षांच्या कारभाराविरोधात अविश्वास प्रस्ताव सादर केला आहे. गेल्या काही महिन्यांपासून नगरपंचायतीच्या कामकाजावरून नाराजी व्यक्त होत होती. विकासकामांमध्ये झालेला विलंब, निर्णय प्रक्रियेतील कथित एकतर्फीपणा तसेच प्रशासनातील असंतोष या मुद्द्यांमुळे नगरसेकांनी हा कठोर निर्णय घेतल्याचे बोलले जात आहे.जिल्हाधिकाऱ्यांच्या निर्देशानुसार आज विशेष बैठकीत या प्रस्तावावर चर्चा व मतदान होणार असून, बहुमताच्या आधारे प्रस्तावाचा निकाल लागणार आहे. जर अविश्वास प्रस्ताव मंजूर झाला, तर अध्यक्ष व उपाध्यक्षांना पदाचा राजीनामा द्यावा लागणार आहे आणि नगरपंचायतीत नव्या नेतृत्वाची निवड प्रक्रिया सुरू होईल.दरम्यान, या राजकीय घडामोडींमुळे शहरातील वातावरण चांगलेच तापले असून, नागरिकांमध्येही उत्सुकता निर्माण झाली आहे. काही नागरिकांनी पारदर्शक व प्रभावी प्रशासनासाठी हा निर्णय योग्य असल्याचे मत व्यक्त केले आहे, तर काहींनी राजकीय संघर्षामुळे विकासकामांवर परिणाम होऊ नये, अशी अपेक्षा व्यक्त केली आहे.आज होणाऱ्या मतदानाच्या निकालाकडे संपूर्ण सिरोंचा तालुक्याचे लक्ष लागले असून, नगरपंचायतीत सत्तांतर होणार की विद्यमान नेतृत्व आपले स्थान टिकवणार, याचा उलगडा काही तासांतच होणार आहे.
